يا حكومة يامعالي رئيس الوزراء مطلوب كام تريليون عشان المصريين يعيشوا كويس … انا هجبلك 5 تريليون جنيه أيه رأيك ينفعوا

  • تاريخ النشر :
  • عدد المشاهدات : 3875 4 5
يا حكومة يامعالي رئيس الوزراء مطلوب كام تريليون عشان المصريين يعيشوا كويس ... انا هجبلك 5 تريليون جنيه أيه رأيك ينفعوا

ممكن من فضلك تسمعني

معالي السيد رئيس وزراء جمهورية مصر العربية السلام عليكم ورحمة الله وبركاته أسمحلي أقدملك نفسي أنا مواطن مصري ضابط شرطة سابق بدرجة كاتب من 35 سنة وأنا بكتب وبألف مهموم بحاجة واحدة بس هي أزاي نعيش كمصريين عيشة كريمة يرضي فيها عننا ربنا ونرضي فيها عن نفسنا يعني ببساطة ان كل هموم الشأن المصري ككاتب فكرت فيها من زمان وأنا مش اللي بيحبوا يقولوا ويتكلموا وبس عن المشاكل والمتاعب لكن كنت دايما ببحث عن الحل وأسمحلي أقول لسيادتك إن عندي مجموعة حلول كاملة ممكن تساعد في إن حياتنا تبقي أحسن أرجوك اسمعني وبرجوك تاني تسمعني وبرجوك تالت ورابع وخامس تسمعني عشان عارف أن ممكن وقتك ميسمحش أنك  تسمعني فمن فضلك أسمعني وأنا هدخل علطول في صميم الموضوع أنا هوفرلك 5 تريليون جنيه من الهوا ومن غير ما نحمل ميزانية الدولة أي مشكلة بس من فضلك لو جم نصرفهم في حاجات تخص حياة الناس اليومية وهقولك تصرفهم في ايه عشان مش بس المهم اني هجيبلك الفلوس لكن المهم  انهم يتصرفوا  في اللي هقول لسعادتك عليه  عشان الناس بقت حياتها صعبة جدا والحاجات دي هتبل رئيهم وترجعلهم النفس من تاني

وبداية أنا مؤمن جدا بفكرة الإصلاحات الاقتصادية وأن أحنا نعيش بجد عصر الاقتصاد السوق الحر الحاجات دي بره الميزانية

البند الأول :في أد أيه كام برج سكني أتعمل مخالف من 2010 الي 2017 أنا معنديش إحصائيات رسمية   لكن ممكن أقول لسعادتك من خلال عينة عشوائية  في كام مدينة مصرية ان الموضوع مش هيقل عن 100 ألف برج في المتوسط بأختلاف المدن والمناطق تقريبا صاحب البرج المخالف كسب 10 مليون جنيه وفي طبعا اللي كسب 2 مليون و3 مليون بس وفي اللي كسب 30 و 40 مليون انا بقول في المتوسط يبقي 10 مليون معظم الابراج دي اساسها سليم وتشيل الادوار المخالفة يعني مفيش منها خطورة علي حياة الناس طاب نتعامل معها ازاي لو سياتك أخدنا من كل برج من دول مليون او 2 مليون يبقي علي الاقل هنجيب من الناس دي من 100 لـ 200 مليار جنيه ومفيش حاجة اسمها منعرفش نجيبهم عشان الناس دي عاملة نظام الكاحول وخلافه اللي بيتحايلوا بيه علي القانون احنا نجيب الكاحول ونجيبهم وأدفع ياحبيبي فورا ويتنفذ الكلام ده علطول ويتفتح حساب يروحوا يدفعوا بيه ويطلع قرار بكده ينظم العملية ويبقي ليه مدي أقصاها 3 شهور واللي مش هيدفع هنفرض حصار علي أمواله وممتلاكاته ونحجز عليها مش ممكن الموضوع ده يتحصر مش ممكن سيادتك حكومتك تعمله وأراضي الدولة اللي قدرنا نرجع جزء كبير منها مش كانت حقوق مهدرة و ممكن بقي اقتراحي ده سيادتك وحكومتك تدرسوا وتاخدوا قرار بيه او ترفعوا بيه مذكرة للسيد الرئيس عشان الناس اللي كسبت من غير وجه حق ممكن ناخد منهم أموال في شكل غرامة من خلال قانون انتقالي بينظم ظروف المخالفات دي أعتقد ممكن جدا

البند التاني : اللي هيجيب حوالي نص تريليون جنيه هو البناء اللي تم علي الأراضي الزراعية الإحصائيات بقي بتقول ودي حاجة أنا عارفها عشان أنا فلاح وكمان عشان أنا بعترفلك وبقولك أهو أنا بنيت علي أرض زراعية وخالفت عشان أعمل مشروع زراعي أعرف أعيش منه عشان سياسة الدولة الفاشلة في الزراعة هي اللي خلتني أعمل كده عشان لو مكنتش بنيت عشان أعمل مشروع كنت بيعت أرضي عشان أعرف أكل بس والمشروع اللي انا عملته ده عم معدل 100متر علي كل فدان يعني لو عندي 10 فدادين يبقي أخدت 1000 متر الالف متر دوول عملولي مشروع في الاستثمار الزراعي وتربية الدواجن وحظيرة مواشي جابلي دخل ضعف  دخل الـ 10 فدادين واكتر وبكده شغلت عندي 10 فرص عمل دايمة وفي ناس فلاحين لقوا مكان يسكنوا عندي ويشتغلوا ..  أنا بقول لسيادتك وأنا مصري وفلاح وبكلمك من الواقع أنه في حوالي 300 ألف فدان تم البناء عليهم الفدان بـ 4200 متر يعني في مليار و200 مليون متر تقريبا تم البناء عليهم ومينفعش يرجعوا تاني ووزارة الداخلية أيدت وجهة النظر في التصالح فيهم والنواب كمان طالبوا بكده وأنا بقول لسيادتك أن ده برضه حل لأن مش هينفع ترجع الأرض تاني زراعي وبالرغم من أن هي كانت حالة فوضي وعشوائية وأنا نفسي طالبت من 2007 أنه يتم البناء المنظم لضرورات التنمية الزراعية وبرسوم ولو كان ده أتنفذ مكانتش الفوضي دي حصلت لكن محدش بيسمع حاجة في البلد دي ومعلش أنا بقول لسعادتك كده ومتزعلش لأن أنا أتكلمت كتير وبعت لسعادتك نداءات مدفوعة الأجر ومحدش استعني يبص عليها فمثلا أنا بعت للرئيس الأسبق مبارك نداء في 22 / 7 / 2010 في جريدة المساء عشان بطالب بعمل مشاريع تصنيع زراعي للفلاح وسكن علي أرضه فسيادته في 27 / 7 بعد أربعة أيام بس أجتمع مع مجموعة من الوزراء المعنين ووجه بعمل تجمعات صناعية زراعية للفلاح المصري بالريف القديم والأراضي الجديدة والاستاذ أسامة سرايا رئيس تحرير الأهرام وقتها بشر في مقالته كمان بعودة القرية المنتجة طبعا بتوجيه رياسي بالكتابة في الموضوع ده بعد 27 / 7 وفي شهر 11 طالبت الرئيس بسرعة تنفيذ توجهاته بنداء أيضا في المساء بعدها بعدة أيام أجتمع سيادته وطلب من الوزراء المعنين الرحمة سرعة تنفيذ توجهاته وانا بكلم معاليك عشان وبقول لسيادتك ان في دلوقتي مليار و200 مليون متر تم البناء عليهم اللي هما مساحة الـ 300 ألف فدان لو سيادتك خدت علي المتر 300 جنيه وقنن أوضاعه الفلاح وكان الـ 300 جنيه دول بمثابة غرامة فالفلاح هيدفعها وهو كسبان يبقي الدولة تستفيد هي كمان ويبقي عملنا حاجة أسمها توفيق اوضاع متعلقة بظروف المرحلة اللي حصلت دي ونصدر قوانين بعد كده يتم فيها تخطيط عمراني سليم لتنظيم إجراءات البناء وعارف بقي معاليك لو عملنا توفيق الأوضاع دي اللي هي كده كده اصبحت اراضي مبنية والفلاح استفاد منها عارف سعادتك لما 300 جنيه علي المتر هيجبوا 360 مليار جنيه علي الـ 200 مليار من المباني يبقي حوالي نص تريليون جنيه هيخشوا للدولة من برا الميزانية كلها والموازنة وملهمش علاقة بخطة الاصلاح وبالنسبة للفلاحين انا أؤكد لسيادتك ان كل فلاح هيقوم بتسديد الـ 300 جنيه فورا وأنا بعترف اني مخالف واول واحد مستعد ادفع  وممكن كمان ندخل البنوك بضمان الأراضي دي وتقوم بعملية اقراض الفلاحين اللي مش قادرين والفلاح مش هيضرب بوبة زي المستثمرين  أياهم اللي كلنا عارفنهم   معلش انا بكلم سعادتك بالفلاحي والعامي عشان اقول لسعادتك ان المواضيع سهلة وبسيطة ومش محتاجة لوغرتيمات وبقي سيادتك من الـ 500 مليار دول عشان خاطري وأنا راجل أمن وفاهم قوي معني الكلام اللي بقوله لسعادتك ازاي ممكن يكون أثره الايجابي علي استقرار الامن والنظام ارجو معاليك ان الـ 100 مليار جنيه الاولي يضخهم مجلس الوزراء مباشرة من خلال إقراض مليون شاب كل شاب 100 الف جنيه قرض طويل الأجل من خلال قرعة زي قرعة الوظائف انا عارف ان الكلام ده مش منطقي شوية بس معلش مطلوب نخليها كده من غير إجراءات بنكية ائتمانية مع منح الشباب دول 5 سنوات فترة سماح قبل سداد القروض ونسيب الموضوع ده ونسمي هذا القرض قرض تعويم ومعناه تعويم لطاقة الشباب ونسيبهم كل واحد يتحمل مسئولية القرض ده ونبقي نسيبهم لو مليون مشروع نجح منهم 50 % يبقي أحنا كسبنا 500 ألف مشروع المشروع بيتكلف 200 ألف جنيه هيشغل ناس وهنكسب 500 ألف شاب بدأوا يكون عندهم امل في الحياة ده غير اللي هيشتغل معاهم ونبقي عملنا اللي علينا مع الـ 500 الف اللي فاشلين وبكده نبقي أشترينا شبابنا بـ 100 مليار جنيه من انهم يقعوا في براثن الارهاب والتطرف والهجرة غير الشرعية والجاسوسية والمخدرات والاجرام والقتل والسرقة وغيرها من الجرائم أو يقعدوا علي القهاوي ويملوا الكافيهات ويشدوا شيشة وينفخوا في الدنيا  عشان ميطقوش  وكمان بكده نخلق حالة حيوية عامة في المجتمع هتوصل في كل نجع وكل قرية وهتمثل قيمة مضافة لاقتصاد الدولة لاقتصاد الرسمي وهتدخل عنصر فاعل في عملية الاصلاح وهتخلق نموذج وقدوة للاخرين وهتغير عقول الموظفين الاغبياء اللي متحنطين وكارهين ان يبقي في اي مشروع ناجح  وهيفتح أبواب امل كتيره جدا لأنه هيبقي فيه عملية بث حقيقي ومباشر لطاقة الامل في المجتمع كله هتخلي الميزان السياسي والمزاج العام للدولة يستقر صدقني سعادتك وهيمنح قدرات إضافية للشعب كله علي الصمود والصبر  في تحمل أعباء الإصلاح الاقتصادي لان الدم بدأ يجري في شرايين أبنائه فقلب الشعب هينبض بالأمل عشان خاطر مصر ولو بنحب البلد دي وبنتقي ربنا فيها نعمل كده ومنبصش للجانب الفاضي من الاناء ونقول ان الشباب بياخد القروض وبيتعامل معها بسفه والكلام ده قاله الرئيس مبارك زمان لما مأمنش للشباب ورمي حمله الاقتصادي علي رجال الاعمال اللي سرقوا البلد ونهبوها وللاسف مكانش نسبة قليلة جدا اللي كانت رجال اعمال حقيقين والاغلبية كانت هابرين ونصابين وبعدين مية مليار كمان عشان خاطر مصر اهم من بره الميزانية ندعم بيهم كل شاب وشابة عقدوا قرانهم وعايزين يكملوا مصاريف جوازهم هندعم حالة الجواز لشاب وشابة بـ 50 ألف جنيه يعني هندعم 2 مليون حالة جواز يعني هنساهم  في ستر 4 مليون شاب وشابة وكمان الفلوس دي تبقي عبارة عن سلع عينية من منتجات مصانع مصرية وهنحرك بكده كمان حركة استثمار وتصنيع زي علي سبيل المثال الأجهزة الكهربائية والاساس وغيره وممكن نسلمهم لشبابنا من خلال معارض أو من خلال شركات زي عمر أفندي مثلا وده برضه بقرعة شفافة دول 200 مليار جنيه وهجيب لسيادتك في المقال الجاي 500 مليار لغاية ما أكملهم لسيادتك ان شاء الله 5 تريليون  جنيه هندعم  بيهم برضه الشباب والاسرة وهندخل علي اصلاح منظومة الصحة كاملة وغيرها وغيرها من احتياجات المواطن وفي النهاية لا أملك إلا ان أقول هذه الاية ” ربنا أفتح بيننا وبين قومنا بالحق وأنت خير الفاتحين ”

” وأما الزبد فيذهب جفاء وأما ما ينفع الناس فيمكث في الأرض ”

” وقل أعملوا فسيري الله عملكم ورسوله والمؤمنون “

تعليقات الفيسبوك







للإعلان

د. أحمد محمد جنيدي

بكالوريس الطب والجراحة مع مرتبة الشرف

دراسات عليا ماجستير البطن والقلب جامعة الاسكندرية

العيادة : دسوق شارع المركز أمام صيدلية الحكمة

العيادة معدة بأحدث الأجهزة للفحص

تليفون العيادة : 01021841904

تليفون منزل : 0472568774

موبايل : 01117791763

للمشاركة في مشروع التكافل الطبي بأشراف الموقع 4 حالات كشف شهري مجانا بخطاب معتمد من إدارة العلاقات الإنسانية بالموقع

%d مدونون معجبون بهذه: